२५ साउन काठमाडौं । काठमाडौंको न्यूरोडमा रहेको कुनै बेलाको चर्चित रञ्जना सिनेमा हल अब अत्याधुनिक ‘रन्जना ट्रेड सेन्टर’को रुपमा संचालनमा आएको छ ।
आइतवार उक्त ट्रेड सेन्टरको उद्घाटन बरिष्ठ संष्कृतिबिद एवम् साहित्यकार सत्यमोहन जोशीले गरे ।
ट्रेड सेन्टरभित्र ३ सय ७० वटा व्यापारिक पसलहरु रहेका छन् । एउटै भवनभित्र विभिन्न पसलहरु उपलब्ध हुने गरी सेन्टरलाई सञ्चालनमा ल्याइएको हो । सेन्टरमा फेन्सी तथा रेडिमेड, जुत्ता, व्याग, गर-गहनालगायतको होलसेल पसलहरु रहेका छन् । आठ हजार वर्ग फिटको फुड कोर्ट रहेको ट्रेड सेन्टरभित्र सिनेमा हलसमेत रहेको छ । डबल बेस्मेन्टको पर्याप्त पार्किङ सुविधा, लिफ्ट, इस्कालेटर र सुरक्षाका लागि सिसि टिभीसमेत जडान गरिएको कम्पनीले जनाएको छ ।
पसलका सटरहरु रिमोट कन्ट्रोलयुक्त स्टेन्लेस स्टिलमा रहेका छन् । सटर खोल्न रिमोट र कोड अनिवार्य पर्ने भएकाले पूर्णसुरक्षित रहेको कम्पनीको दाबी छ । सेन्टरका व्यवसायीको लागि छुट्टै गोदाम घरको समेत व्यवस्था गरिएको छ । गोदामको बीमा पनि गरिएको छ ।
सेन्टरका अध्यक्ष कालु गुरुङले रन्जना ट्रेड सेन्टरलाई अत्याधुनिक बनाइएको बताए । ‘ट्रेड सेन्टरभित्र व्यापार गर्ने व्यापारीलाई ढुक्क बनाउन सुरक्षा र सुविधा प्रदान गरिएको छ’, उनले भने ।
0 comments:
Post a Comment